ما حدا على راسه ريشه..!

آراء ومقالات لكتّاب أردنيين

المشرف: Princess

قوانين المنتدى
• يمنع وضع اي مواد محمية بحقوق نشر دون موافقه مسبقه من صاحبها
قوانين المنتديات العامة
أضف رد جديد
Red-rose
صديق المنتدى
صديق المنتدى
مشاركات: 58112
اشترك في: الأحد سبتمبر 28, 2008 1:33

ما حدا على راسه ريشه..!

مشاركة بواسطة Red-rose » الأربعاء إبريل 08, 2020 6:40

صورة



ما حدا على راسه ريشه..!
#ايمان_عكور

بعرف.. كثير منكم راح يحكي عني مجنونة..!
وبعضكم راح يقول بدها بس تتفلسف..
وعدد يمكن بسيط يتعاطف معي
وعدد ثاني راح يلاقيها فرصة يتنمر علي ويخليني مادة سخرية

انا اسمي الكامل ايمان احمد العكور
اعلامية ، مواليد اربد عمري 55 سنة
ارملة.. عندي اخو واحد وست اخوات
وابوي وامي حاليا عندي بعمان..(الحمدالله بالصدفة انحبسوا هون)
وبخاف عليهم اكيد من كورونا..
وساكنة بالرونق الدوار الثامن..!

خلال الاسبوعين الماضيات ورغم الحجر
لكني مشيت كم مشوار للدكاكين اللي بالحارة
اجتمعت انا وجارتي وصديقتي كم مرة
مع مراعاة التعليمات
رحت على محل الصرافة بالبيادر وانا خايفة بس كان في ناس لازم نساعدهم بهيك ظروف.
ومرتين عالصيدلية( بعطيكم العنوان)
لانه ما في حدا غيري يجيب اغراض البيت.

بعدكم بتتسائلوا اكيد شو قصتي اخر هالليل
ما انجنيت ما تخافوا.. بس مقهورة على اللي بصير.. ومتاكدة اني ما على راسي ريشة
زي ما كل حدا بالعالم الآن ما عليه هالريشة
لانه كلنا بالهوا سوا.. او خليني اقول
كلنا بالكورونا سوا..

احتمال أكون وخلال هالكم مشوار ورغم كل الاحتياطات.. تعقيم كمامات.. غسيل كل المشتريات، تشميس الملابس وحمام.. الخ
ما ضل غير اعقم ادوات التعقيم نفسها..!
بقلكم احتمال لا سمح الله اني غلطت بلحظة.. وفتحت المجال للسيد كورونا يزورني
احتمال اكون مستضيفيته في جسمي وانا مش عارفة وما حدا عارف..

اللي زهق.. ما يكمل قراءة

قررت علشان هيك.. اعطيكم كل المعلومات من الآن.. صوري عالفيسبوك قدامكم.. اهلي
ابناء اخواتي.. شو هواياتي.. مين صديقاتي.. الخ من بقية المعلومات اللي بتتشاطروا تجمعوها عن كل مسكين الفيروس يصيبه.. يعني فوق نفسيته.. وفوق رعبه.. وفوق خوفه على اهله واطفاله واصحابه
بتزيدوا الطين بله.. وبتبداؤا تنبشوا قصة حياته واسراره الشخصية ومين حب بحياته ومين تزوج وكيف وليش وصور العرس وتفاصيل فستان العروس وشهر العسل..!
اما اذا زبطت معكم أكثر.. بتصير كل كلمة بحياته كتبها او نشرها هون وهون
بتصير زي حبل المشنقة بتلفوها على رقبته..!

والادهى من هيك كله..
بتعملوا حالكم عباقرة.. وكورونا ما بسترجي يقرب منكم.. واحنا اغلبنا مقضيها رايح جاي بحاول يعمل حاله عنتر زمانه..!

هلكتونا جماعة stay at home
ولما (صبحي او عريس او ممرضة) فينا بنصاب بتطلعوا كل ضغوطاتكم .. وغلكم، ،وعقدكم النفسية وبتبطل الكمامات حتى ام 25 دينار تخفي بشاعة داخلكم..

لا.. والمضحك المبكي انه بتفكروا انه الموضوع خفة دم.. لكنه دمار للمريض واهله واطفاله
انه اكون مصابة بكورونا صارت اسوأ من جريمة شرف اللي كمان مجتمعنا المنافق بتاجر فيها لمصالحه..!
هاي هي الإنسانية في أسوأ حالاتها، لما تتخلص من الغضب والإحباط اللي بسببه الخوف من الفيروس من خلال ممارسة التنمر على شخص ثاني مصاب..!
ترا حصولك على لقب ( مصاب كورونا) احتمال كمان يبقى ارث ملازم لاحفادك..!
يعني بصير اسمي.. ايمان تاعة كورونا

يا جماعة.. ترا إنّي اكون مريضة بالفيروس
مو معناته انه اخلاقي سيئة ونصابة وبداخلي شر..
اني اكون مريضة مو معناتة اكون شماعة تعلقوا عليها قرفكم وضعفكم وفشلكم ببيوتكم او شغلكم.. انو اكون مصابة مش معناته انت الك الحق تسبني وتنتهك خصوصيتي وخاصة اذا انعدى مني حدا ثاني..!

اخر كلماتي.. راح اوجهها لصبحي( ما بعرفه ولا عمري سمعت باسمه الا اليوم)
اللي تشاطر الاغلبية اليوم عليه وما خلو ستر مغطى على حياته..
صبحي اتفقنا او اختلفنا معه وكيف تصرف
هو ضحية.. زي ما كل حدا فينا يمكن يكون بدون ما بعرف.
حرمتوه من انه يحزن على والده اللي ما تركوا لآخر لحظة بحياته..وما بنعرف ظروفه
والده اللي اضطر يدفنه بصمت احتراما لمشاعركم وهو ما بعرف انه مصاب بالفيروس
خلونا نكون بشر شوية..ونراعي وضعه
ومشاعر والدته واولاده اللي الحزن بعده بقلوبهم على رحيل الوالد..
سبيتوه على اساس انه مستهتر بده ينشر العدوى..
سمعته بيحكي حقيقة شو صار
وانه فحصه كان سالب ومع هيك بقي بالبيت إلى ان استدعاه الشغل امس.
كان مفروض انه ما يطلع
وانه يعتذر للشغل.. وهون غلط وكثير كمان

بس مع هيك.. تمنيت حدا الا كم واحد يحكيلنا قديش صبحي انسان طيب.. قديش تعامله مع زملاءه وحارته حلو.. اتمنيت شغله بدل ما يعلق مشنقته واعلان اصابته انه يحكيلنا اي نوع من الناس صبحي..
شغله اللي ما غلب حاله يعرف من شو توفى والد موظف عنده ويطلب منه يلتزم بيته..
السؤال الاهم..
والده المتوفي من وين اجت اصابته..
والاحتمال الاكبر من قريب من فلسطين كان بزيارتهم. ..! وتم اخبار الحكومة
لكن بطء التحرك كان سبب في انتشار الفيروس في العيلة..!

صبحي.. انت غلطت..! بس كمان
مو معقولة كل المصابين بالاردن من زمرة الاشرار..!
اكيد في خصال حلوة بسيرتهم الذاتية
بس بشاعتنا ما بتخلينا نحكي عنها..!
ومع هيك ما بدافع عنه اذا اخطأ
عليه مسؤولية وحقنا عليه لو فعلا استهتر..
لكن بدون ما اسبه.. وما اخلي ستر مغطى على حياته.. واحنا ما بنعرفه.

راح يكون في بالعالم آلاف صبحي.. والعريس
ننتقدهم.. اذا اخطأؤا بس بدون ما نجرحهم
لانه انا وأنت .. ممكن نكون صبحي
بدون قصد..

خلونا نعيد برمجة انسانيتنا المشوهة
شو بدكم اكثر من هالابتلاء من رب العالمين
حتى تكونوا بشر.. بتسامح وبتحب
وبتلتمس العذر لغيرها لو غلط بقصد او بدون قصد..
الفيروس قريبا او بعد فترة راح يلاقوله علاج
الخطر الكبير يبقى
في عقولنا الخربانة المسوسة وين نلاقي علاجها..
كيف نعالج ارواحنا ولا ننجر خلف كلمة فلان وعلان..

ترا ما حدا على راسه ريشه..

انا ايمان العكور..
اي معلومات ثانية علشان مسلسل التنمر اذا احتجتوا اله لا قدر الله.. وانضاف اسمي على قائمة مجرمي كورونا... انا جاهزه..!
المهم ترا راحتكم..!

ملاحظة..
من يريد منكم ان يشارك تحدي لوقف التنمر
نحط صورة شخصية
ويكتب عليها
( انا...... احتمال يكون عندي كورونا)

خلونا نكون مصدر أمل وتفائل
خلونا نطلع أجمل ما فينا
ترا زمن كورونا فرصة.. نعيد حساباتنا
لا تضيعوها.. 💛



ايمان العكور

أضف رد جديد

الموجودون الآن

المستخدمون الذين يتصفحون المنتدى الآن: لا يوجد أعضاء مسجلين متصلين و 6 زوار