صفحة 1 من 1

غْرِيبْ الْحَطَّة

مرسل: الثلاثاء يناير 06, 2009 11:41
بواسطة محمد مومر

غْرِيبْ الْحَطَّة

]يَا الْمَحْگُورْ، مَدْ يِدِيكْ للسُّؤَالْ
واطْلُبْ جْوَابَكْ.. صَدَقَة عَلْ الله
سَگِّي طْعَامَكْ.. بِدْمُوعْ الْحِرْمَانْ
دُقْ بَابْ الْحَقْ
وخَلِّي بَابُو مَسْدُودْ
لْنَاسُو ومْوالِيهْ
واسْمَعْ گْدَامْ رَجْلِيكْ
تْغَنِّي الْمُوَّالْ
والْمَكْتُوبْ حَطْ لَرْحَالْ
عْلَى كْتَافْ الدَّنْيَا
... دْوَامْهَا مُحَالْ
غْرِيبْ الْحَطَّة
مَحْگُورْ..
يَرْقُصْ بِرْمُوشْ لِيَامْ
ويْدَاوِي لَهْبَالْ
بْرِيحَةْ لَفْرَاقْ
والْعِيشَة الْحَارَّة
وكْفَنْ الْفَقِيرْ.. الْمَغْلُوبْ
والصّْبَرْ للِّي طَالْ وطَالْ
يَا الْمَحْگُورْ..
سَرَّجْ لَهْبَالْ
تْبَوْرَدْ.. هَا مَحْرَكْ الْحُگْرَة
تْرَابُو حْقُوقْ مَنْفِيَّة
والزَّاوْيَة
رَابَتْ عْلَى خْدُودْ الشُوَّافَة
... مُولاتْ الْفَالْ
ذَابَتْ هْمُومَكْ
عْلَى نَارْ.. مَغْرُومَة
زِينْهَا فْلُونْهَا
حُبّْهَا يَحْرَقْ الإِحْسَاسْ
... ويشَرَّدْ الْبَالْ
شْرُبْ كَاسْكْ يَا الْمَحْگُورْ
يَشْفِي عَلّْتَكْ الْمَسْكُونَة
سَاعْتَكْ غْرِيبَة
وكَفَّكْ مَصْلُوبْ
عْلَى شَمْسْ لَعْيُونْ
الْبَاكْيَة فِدْرُوبْ الْمَحْنَة
ولا مَنْ يْسُوَّلْ ويْسَالْ
يَا الْمَحْگُورْ
مَدْ يِدِيكْ للسُّؤَالْ


Re: غْرِيبْ الْحَطَّة

مرسل: الثلاثاء يناير 06, 2009 1:43
بواسطة مدير المنتدى
مشكور جدا :)

Re: غْرِيبْ الْحَطَّة

مرسل: الثلاثاء يناير 06, 2009 6:36
بواسطة بنت الأردن
مشكور!

Re: غْرِيبْ الْحَطَّة

مرسل: الأربعاء يناير 07, 2009 10:15
بواسطة عابرة سبيل
يسلمو اديك

Re: غْرِيبْ الْحَطَّة

مرسل: الجمعة يناير 09, 2009 10:13
بواسطة ابو مهيمن
شكرا لك