سبحان الله..

[محمد مومر]

[align=center]سبحان الله..


سبحان الله
النَّاسْ بِكْلامْهَا دَرْجَاتْ
وكُلْ دَرْجَة لُومْ وعِتَابْ
مُوسْ حَافِي مَغْرُوسْ فِالذَّاتْ
بِالدَّمْ يَرْسَمْ لْوَاحُو فِسْحَابْ
يْهَرَّسْ ضْلُوعْ الشَّاقِي هُرْسَاتْ
نْدَامَة فْوَجْهُو يْسَدّْ الْبَابْ
العُنْوَانْ مَجْهُولْ حْرُوفُو نُقْطَاتْ
والْمَعْنَى تَايْهْ وتْقَرْقِيبْ النَّابْ
سبحان الله
النَّاسْ بِفْعَالْهَا حَارَتْ لَذْهَانْ
صْبَاحْهَا شْرِيدْ ومْسَاهَا عْنِيدْ
الْوَقْتْ مَحْسُوبْ فِكْفُوفْ الْمِيزَانْ
والْغَادِي فِطْرِيقُو مَا گَادّْ يزِيدْ
النَّفْسْ غَدَّارَة مَا فِيهَا أَمَانْ
ولَگْلُوبْ قَاسْحَة صْخَرْ وحْدِيدْ
الكَلْمَة الزِّينَة مَا عَنْدْهَا لْسَانْ
الْخَيْر هَزّْ رْحِيلُو لَبْعِيدْ
مْسَافَرْ بْلا ڤِيزَا قَاطَعْ الشُّطْآنْ
يْغَنِّي لَهْوَالْ لَحْنْ جْدِيدْ
سبحان الله
لَقْفَلْ صَدَّا والسَّارُوتْ غْرِيبْ
لَعْقَلْ سَارَحْ فِدْرُوبْ التَّفْكِيرْ
الْگَلْبْ يْنِينْ دَمُّو لْهِيبْ
ودْخَالْ بْنَادَمْ مَا عَنْدْهَا تَعْبِيرْ
سبحان الله
الْبَزُّولَة ذْبَالَتْ مَا فِيهَا حْلِيبْ
النَّفْسْ بَارْدَة مَا بْقَاتْ تْغِيرْ
الصّْبَاعْ مَبْصُومَة والْفِكْرْ يْشِيبْ
السُّؤَالْ مْعَلَّقْ وجْوَابُو فْبِيرْ
سبحان الله
حَمَّمْ نِيفَكْ وگُولْ أَنَا حَدَّادْ
ونَاسْ الْحَالْ طَالْبَة التُّوبَة
تْقَطْعَاتْ لَحْبَالْ والْخَيمَة بْلا وْتَادْ
والرَّزْقْ تَالَفْ فِگُفَّة مَثْقُوبَة
لَغْرِيبْ يْحَنّْ لْرِيحَةْ لَبْلادْ
وسَاعَةْ الْمَلْقَى بِالْهَمّْ مَحْسُوبَة
تْمَنِّيتْ تَفْرَحْ لَمِّيمَة بْلُولادْ
وتْفَيَّقْ لَحْلامْ فِوْجُوهْ مَحْبُوبَة
يْطِيبْ عْشَاهَا عْلَى حْطَبْ وعْوَادْ
تْفَرَّحْ لَصْغَارْ بْلَحْقُوقْ الْمَسْلُوبَة
تْغَطِّيهُمْ بِاسْمْ خَالَقْ لَعْبَادْ
ودَّفِيهُمْ بْحَنَانْ لَمِّيمَة الْمَغْلُوبَة[/align]

[المختار]

حلو

[Khaled Qudah]

مشكوور

[بنت الأردن]

فعلاً

النَّاسْ بِكْلامْهَا دَرْجَاتْ

النَّاسْ بِفْعَالْهَا حَارَتْ لَذْهَانْوالرَّزْقْ تَالَفْ فِگُفَّة مَثْقُوبَة

لَغْرِيبْ يْحَنّْ لْرِيحَةْ لَبْلادْ
وسَاعَةْ الْمَلْقَى بِالْهَمّْ مَحْسُوبَة

مشكور اخي بس حبيت اعرف مين اللي كتب هالشعر؟

[ابو مهيمن]

مشكور , ممكن نعرف الشعر باي لهجه مكتوب

[محمد مومر]

شكرا عل تدخلاتكم القيمة

الشعر مكتوب باللهجة المغربية

تحياتي الصادقة

[فراشة الأردن]

أشكرك على هذا الشعر الجميل